ନୂଆଦିଲ୍ଲୀ,୨୦/୦୧: ଆସନ୍ତା ଫେବ୍ରୁଆରୀ ୧୪ ତାରିଖରେ ଚଣ୍ଡିଗଡରେ ଚାଷୀ ଓ ସରକାରଙ୍କ ମଧ୍ୟରେ ବୈଠକ ଅନୁଷ୍ଠିତ ହେବ । ବୈଠକରେ ବିଭିନ୍ନ ଚାଷୀ ନେତା, କେନ୍ଦ୍ର ସରକାର ଓ ପଞ୍ଜାବ ସରକାରଙ୍କ ମନ୍ତ୍ରୀ ସାମିଲ ହେବେ । ଏଥିରେ ଚାଷୀଙ୍କ ମୁଖ୍ୟ ଦାବି ସବୁ ଫସଲର ଏମ୍ଏସ୍ପିକୁ ଆଇନଗତ ଗ୍ୟାରେଣ୍ଟି ସମେତ ୧୨ଟି ଦାବି ଉପରେ ଆଲୋଚନା କରାଯିବ । କେନ୍ଦ୍ର ସରକାର ଆନ୍ଦୋଳନ ଜାରି ରଖିଥିବା ଚାଷୀଙ୍କ ସହ ଆଲୋଚନା କରିବାକୁ ରାଜି ହୋଇଛନ୍ତି ।
ରବିବାର କେନ୍ଦ୍ର ସରକାରଙ୍କ କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟର ଯୁଗ୍ମ ସଚିବ ପ୍ରିୟ ରଞ୍ଜନ ହରିୟାଣା-ପଞ୍ଜାବର ଖନୌରୀ ସୀମାରେ ଗତ ନଭେମ୍ବର ୨୬ ତାରିଖରୁ ଆମରଣ ଅନଶନ ଚଳାଇଥିବା ଚାଷୀ ନେତା ଜଗଜୀତ ସିଂହ ଡଲେୱାଲଙ୍କୁ ଭେଟିଥିଲେ । ଚାଷୀଙ୍କ ଦାବି ଉପରେ ସରକାର ଆଲୋଚନା ପାଇଁ ପ୍ରସ୍ତୁତ ଥିବା ନେଇ ଜଣାଇବା ପରେ ଡଲେୱାଲ ମେଡିକାଲ ଚିକିତ୍ସା ନେବାକୁ ରାଜି ହୋଇଛନ୍ତି । ଫଳରେ ତାଙ୍କ ଦେହ ଗୁରୁତର ହୋଇପଡିଥିବାରୁ ତାଙ୍କୁ ଗ୍ଲୁକୋଜ ଦିଆଯାଇଛି । ସେପଟେ ୭୦ ବର୍ଷୀୟ ଡଲେୱାଲଙ୍କୁ ସମର୍ଥନ କରି ଅନଶନରେ ବସିଥିବା ୧୨୧ ଜଣ ଚାଷୀ ରବିବାର ପୁଲିସ ଆଇଜିଙ୍କ ହାତରୁ ଫଳରସ ପିଇବା ପରେ ଅନଶନ ଭଙ୍ଗ କରିଛନ୍ତି । ତେବେ ଏମ୍ଏସ୍ପିକୁ ଆଇନଗତ ଗ୍ୟାରେଣ୍ଟି ନ ମିଳିବା ପର୍ଯ୍ୟନ୍ତ ଅନଶନ ଚାଲୁ ରହିବ ବୋଲି ଚାଷୀ ନେତାମାନେ କହିଛନ୍ତି ।
